Editor's choices of လူထုဦးလှ

ကျွန်တော် သံလွင်ဖောင်စီး (လူထုဦးလှ) (အတ္ထုပ္ပတ္တိ / ကိုယ်တွေ့မှတ်တမ်း)

မိုင်ပေါင်း (၁၇၀၀) ရှည်ပြီး ကမ္ဘာ့အရှည်ဆုံးနှင့် အကြီးဆုံးမြစ်စာရင်းဝင်ဖြစ်သည့် သံလွင်မြစ်နှင့် သံလွင်မြစ်ကြောတစ်လျှောက် သစ်တောများတွင် သက်စွန့်ဆံဖျား သစ်ဆယ်ကြသည့် အလုပ်သမားအကြောင်းကို လူထုဦးလှက လေ့လာမှတ်တမ်းတင်ထားခြင်း ဖြစ်သည်။ သံလွင်မြစ် ဝဲယာကမ်းများရှိ ကျွန်းသစ်ထုတ်လုပ်ရေးလုပ်ငန်းများမှ ထွက်ရှိလာသော သစ်များကို ရေမျောကမ်းတင်စနစ်ဖြင့် လိုရာခရီးသို့ သယ်ဆောင်ကြရာတွင် ခရီးစဉ်အစမှ အဆုံးထိ ပျှမ်းမျှ (၄) နှစ်ထိအောင်ပင် ကြာမြင့်သည်ဟု ဆိုသည်။ ထိုသို့ စိတ်ဝင်စားဖွယ်ကောင်းလှသည့် သစ်ထုတ်လုပ်ရေးလုပ်ငန်းအကြောင်း၊ သစ်ထုတ်လုပ်ရေးလုပ်ငန်းတွင် ပါဝင်ပတ်သက်နေသူများ၏ လူမှုစီးပွားဘဝ၊ ဝင်ငွေနှင့် မမျှအောင် အန္တရာယ်အသွယ်သွယ်ကြားမှ သက်စွန့်ဆံဖျား လုပ်ကိုင်ကြရပုံများကို လူထုဦးလှက ကိုယ်တိုင်ကွင်းဆင်းလေ့လာကာ စိတ်ဝင်စားဖွယ် မှတ်တမ်းတင် ရေးသားထားသည်။

ကျွန်တော်လှေသူကြီး (လူထုဦးလှ) (အတ္ထုပ္ပတ္တိ / ကိုယ်တွေ့မှတ်တမ်း)

အသက် (၉၀) ရှိပြီဖြစ်သည့် လှေသူကြီး ဘကြီးရှိန်ကို လူထုဦးလှသည် ၁၉၇၁ ခုနှစ်က သွားရောက်တွေ့ဆုံကာ ဘကြီးရှိန်၏ ဘဝအတွေ့အကြုံများကို မေးမြန်း မှတ်တမ်းတင်ထားခြင်း ဖြစ်သည်။ ခရစ်နှစ် ၁၈၈၀ ကျော်လောက်မှ စတင်ကာ လွတ်လပ်ရေးရပြီးသည့် ကာလတိုင်အောင် ဘကြီးရှိန်၏ ဘဝလမ်းခရီးတွင် ကြုံတွေ့ခဲ့သမျှ လောကဓံအနိမ့်အမြင့်များ၊ လှေသူကြီးဘဝနဲ့ အနယ်နယ်အရပ်ရပ် ရောက်ခဲ့သလို ဘဝနှောင်းပိုင်းမှာလည်း ရန်ကုန်တို့ မြင်းခြံတို့မှာ နေထိုင်ခဲ့ဖူးသူ ဘကြီးရှိန်၏ ဒေသန္တရအတွေ့အကြုံနှင့် ဗဟုသုတများအပြင် လွန်ခဲ့တဲ့နှစ်များစွာက မြန်မာလူမျိုးတွေရဲ့ လူမှုဘဝကို လေ့လာနိုင်စေမည့် စာအုပ်လည်း ဖြစ်သည်။

ကျွန်တော် စတီးပွဲစား (လူထုဦးလှ) (အတ္ထုပ္ပတ္တိ / ကိုယ်တွေ့မှတ်တမ်း)

သီပေါမင်း ရတနာဂီရိသို့ ပါတော်မမူမီ ၁၅ နှစ်၊ မင်းတုန်းမင်း နတ်ရွာမစံခင် ၈ နှစ်၊ ခုနှစ်အားဖြင့် ၁၈၇ဝ ခုနှစ်က ဝီလီယန်စထရင်းစတီး ညီအစ်ကိုတို့ တည်ထောင်ခဲ့ပြီး သစ်တော၊ စိုက်ပျိုးရေး၊ ရေနံ၊ သွင်းကုန်၊ ထုတ်ကုန်လုပ်ငန်းများဖြင့် အောင်မြင်ကျော်ကြားခဲ့သော စတီးဘရားသားကုမ္ပဏီ၏ သမိုင်းကြောင်းကို လူထုဦးလှက ၎င်းကုမ္ပဏီမှ လူယုံပွဲစားတစ်ဦးထံမှတဆင့် မေးမြန်းမှတ်တမ်းတင်ရေးသားထားခြင်း ဖြစ်သည်။ သူတို့ ကုမ္ပဏီကို မည်သို့သော အရင်းအနှီးများဖြင့် စတင်တည်ထောင်ခဲ့ပုံ၊ မြန်မာပြည်တွင်း စေးကွက်ကိုမည်သို့ ရယူသွားခဲ့ပုံ၊ တိုင်းရင်းသားများကို အလုပ်အကိုင်ပေးနိုင်သလို သူတို့၏ အကျိုးအမြတ်ကိုလည်း အကျိုးရှိရှိ ရယူသွားခဲ့ပုံများ၊ ပွဲစားများ၏ ဘဝအထွေထွေ အစရှိသည်တို့ကို စီးပွားရေးရှုထောင့် အပါအဝင် ရှုထောင့်စုံမှ မှတ်တမ်းတင် ရေးသားထားသည်။

သောင်းပြောင်းထွေလာ ရေးချင်ရာရာ (အတွဲ ၁) (လူထုဦးလှ) (ကဗျာ / အက်ဆေး / ပေးစာ / မိန့်ခွန်း / ဟောပြောချက်)

လူထုသတင်းစာတွင် စာရေးသူရေးသားခဲ့သည့် သောင်းပြောင်းထွေလာ ဆောင်းပါးများကို စုစည်းထုတ်ဝေထားခြင်းဖြစ်သည်။ ရေးလိုသည်များကို အထူးတလည် အားမထုတ်ရဘဲ ပေါ့ပေါ့ပါးပါး သွက်သွက်လက်လက် ရေးနိုင်ရန် ရည်ရွယ်၍ ဤ“သောင်းပြောင်းထွေလာ” ကဏ္ဍကို ဖွင့်လှစ်ခဲ့ခြင်းဖြစ်ပြီး ခေါင်းစဉ်အတိုင်းပင် သူရေးချင်ရာရာ စိတ်ကူးပေါက်ရာ အမျိုးစုံအောင်ပင် ရေးသားနိုင်ခဲ့သည်။ နိုင်ငံ့ရေးရာကိစ္စများ၊ အမြင်မတော် ဆင်တော်နှင့် ခလောက် ဖြစ်နေသည့် ကိစ္စကြီးငယ်များ၊ ကမ္ဘာကျော် စာရေးဆရာကြီးများ၏ အတ္ထုပ္ပတ္တိဆန်ဆန်အကြောင်းအရာများ၊ စာရေးနည်းများ၊ ဆေးလိပ်နှင့် အရက် ဆန့်ကျင်ရေး ဆောင်းပါးများ၊ ကျန်းမာရေးဆောင်းပါးများအပါအဝင် အကြောင်းအရာ အစုံအလင်ကို ဆောင်းပါးများတွင် ဖတ်ရှုကြရမည်ဖြစ်သည်။

ကျွန်တော့်စာတမ်း ကျွန်တော့်အဟမ်းများ (လူထုဦးလှ) (ကဗျာ / အက်ဆေး / ပေးစာ / မိန့်ခွန်း / ဟောပြောချက်)

လူထုဦးလှ ရေးသားခဲ့သည့် စာတမ်း (၇) စောင်၊ ဟောပြောချက် (၂) စောင်တို့ စုစည်းမှု စာအုပ်ဖြစ်သည်။ လူထုဦးလှ၏ စာပေအယူအဆ၊ စာပေဝါသနာ၊ စာပေအပေါ်ထားသည့် စေတနာတို့ကို စာအုပ်တွင် ဖတ်ရှုလေ့လာကြရမည် ဖြစ်သည်။

သူ့စာတွေကပြောတဲ့ သိပ္ပံမောင်ဝ (လူထုဦးလှ) (အတ္ထုပ္ပတ္တိ / ကိုယ်တွေ့မှတ်တမ်း, ရည်ညွန်းစာပေ (အဘိဓာန် / စွယ်စုံကျမ်း / မြေပုံ / လမ်းညွှန်စာအုပ် / … ))

၁၉၃၀ ခုနှစ် ပတ်ဝန်းကျင်က မြန်မာစာအရေးအသား ပြုပြင်ပြောင်းလဲမှုတစ်ရပ်ကို စမ်းသပ်ဦးဆောင်ခဲ့သူ၊ ထို့ကြောင့် ခေတ်စမ်းသမားများတွင် စိန်ဗေဒါဟုပင် ရွှေကို င်းသား ကလောင်အမည်ခံ ဆရာတော်ဦးသောဘိတက ချီးကျူးခြင်း ခံခဲ့ရသူ၊ ကလောင်အမည်အမျိုးမျိုးဖြင့် စာမျိုးမျိုးကို ရေးသားခဲ့သူ သိပ္ပံမောင်ဝအကြောင်းကို သူနှင့် ခေတ်ပြိုင်စာပေပညာရှင်များ၏ သုံးသပ်ချက်၊ လူသိနည်းသော သူ၏ စာပေလက်ရာများအကြောင်းနှင့်အတူ ရှင်းလင်းရေးသားထားသော စာအုပ်ဖြစ်သည်။

ကျွန်တော် ဗြူရိုကရက် (လူထုဦးလှ) (အတ္ထုပ္ပတ္တိ / ကိုယ်တွေ့မှတ်တမ်း)

ကိုလိုနီခေတ်တွင် Y.M.B.Aအမျိုးသားကျောင်းဆရာ၊ မြို့အုပ်ကလေး၊ မြို့အုပ်ကြီး၊ အခွန်ဝန်၊ နယ်ပိုင်ဝန်ထောက်၊ အရေးပိုင်စသည့် ရာထူးဌာနအသီးသီးမှာ တာဝန်ထမ်းခဲ့ဖူးသည့် ဦးစံတင်ဆိုသော ပုဂ္ဂိုလ်၏ အကြောင်းကို သူကိုယ်တိုင်ရေးသားချက်များကို မှီးကာ လူထုဦးလှက ပြန်လည်ရေးသားထားခြင်းဖြစ်သည်။ သူ့ခေတ်သူ့အချိန်က ဗြူရိုကရေစီ ယန္တယားအောက်က စက်ရုပ်လိုဖြစ်တဲ့ ဗြူရိုကရက်အရာရှိတစ်ယောက်၏ ဘဝကြမ်းပုံကို မချန်မချွင်း တင်ပြထားခြင်းဖြစ်သည်။ ကျောင်းဆရာဘဝအတွေ့အကြုံ၊ အင်္ဂလိပ်ကိုလိုနီခေတ်က မြန်မာလူထု အခြေအနေ၊ မြန်မာအရာရှိများကို အင်္ဂလိပ်များက နှိမ်ပုံ၊ အင်္ဂလိပ်များကို ဘုရားထူးခဲ့ရပုံ၊ ဂျပန်ဝင်စက ငြိမ်းချမ်းရေးထိန်းသိမ်းရေးကော်မတီ ဥက္ကဋ္ဌလုပ်သည့် အတွေ့အကြုံ၊ မြန်မာအလုပ်သမားများကို ဂျပန်ချွေးတပ်စခန်းများအတွက် ချွေးတပ်ဆွဲပေးခဲ့ရပုံ၊ ဂျပန်အပြေး အင်္ဂလိပ်အဝင်အတွေ့အကြုံများအပါအဝင် အင်္ဂလိပ်နှင့် ဂျပန်ခေတ်ကို ကောင်းစွာ မှီခဲ့ပြီး ၎င်းခေတ်များကို ကိုယ်တိုင် အရာရှိဘဝဖြင့်ဖြတ်သန်လာခဲ့ရသူတစ်ဦး၏ စိတ်ဝင်စားဖွယ် မှတ်တမ်းဖြစ်သည်။

နာဂတောင်တန်း တစေ့တစောင်း (လူထုဦးလှ) (ခရီးသွား / ပထဝီဝင်)

မျိုးနွယ်ပေါင်း များစွာရှိသော်လည်း သီးခြားနေထိုင်သော အုပ်စုလေးများဖြင့် မြန်မာပြည်မြောက်ပိုင်း အိန္ဒိယနယ်စပ် နာဂတောင်တန်းများတွင် နေထိုင်ကျင်လည်ကြသည့် နာဂလူမျိုးများအကြောင်း၊ သူတို့၏ ရိုးရာယဉ်ကျေးမှု၊ အယူအစွဲ၊ ဓလေ့ထုံးစံ၊ ဝတ်စားဆင်ယင်မှု၊ လမ်းပန်းဆက်သွယ်ရေး၊ ရိုးရာပွဲတော်၊ ပညာရေး၊ ကျန်းမာရေး၊ ဒေသဖွံ့ဖြိုးရေးအတွက် လိုအပ်ချက်များ အစရှိသည်တို့ကို လူထုဦးလှက ကိုယ်တိုင် ကွင်းဆင်းလေ့လာ၍ မှတ်တမ်းတင် ရေးသားထားခြင်း ဖြစ်သည်။

သောင်းပြောင်းထွေလာ ရေးချင်ရာရာ (အတွဲ ၂) (လူထုဦးလှ) (ကဗျာ / အက်ဆေး / ပေးစာ / မိန့်ခွန်း / ဟောပြောချက်)

လူထုသတင်းစာတွင် စာရေးသူရေးသားခဲ့သည့် သောင်းပြောင်းထွေလာ ဆောင်းပါးများကို စုစည်းထုတ်ဝေထားခြင်းဖြစ်သည်။ ရေးလိုသည်များကို အထူးတလည် အားမထုတ်ရဘဲ ပေါ့ပေါ့ပါးပါး သွက်သွက်လက်လက် ရေးနိုင်ရန် ရည်ရွယ်၍ ဤ“သောင်းပြောင်းထွေလာ” ကဏ္ဍကို ဖွင့်လှစ်ခဲ့ခြင်းဖြစ်ပြီး ခေါင်းစဉ်အတိုင်းပင် သူရေးချင်ရာရာ စိတ်ကူးပေါက်ရာ အမျိုးစုံအောင်ပင် ရေးသားနိုင်ခဲ့သည်။ နိုင်ငံ့ရေးရာကိစ္စများ၊ အမြင်မတော် ဆင်တော်နှင့် ခလောက် ဖြစ်နေသည့် ကိစ္စကြီးငယ်များ၊ ကမ္ဘာကျော် စာရေးဆရာကြီးများ၏ အတ္ထုပ္ပတ္တိဆန်ဆန်အကြောင်းအရာများ၊ စာရေးနည်းများ၊ ကျန်းမာရေးဆောင်းပါးများအပါအဝင် အကြောင်းအရာ အစုံအလင်ကို ဆောင်းပါးများတွင် ဖတ်ရှုကြရမည်ဖြစ်သည်။

သတင်းစာများ ပြောပြတဲ့ စစ်တွင်းဗမာပြည် (အတွဲ ၄) (လူထုဦးလှ) (ရည်ညွန်းစာပေ (အဘိဓာန် / စွယ်စုံကျမ်း / မြေပုံ / လမ်းညွှန်စာအုပ် / … ))

ဒုတိယကမ္ဘာစစ်ကာလ ဂျပန်ပြေးရခါနီး ဖက်ဆစ်တော်လှန်ရေးကာလ၊ မဟာမိတ်တပ်များအဝင်ကာလ၊ ဂျပန်တို့လက်နက်ချချိန် ဂျပန်ခေတ် မြန်မာနိုင်ငံ၏ စစ်ရေးအခြေအနေ၊ စီးပွားရေး၊ လူမှုရေးဖြစ်စဉ်သတင်းများကို စစ်အတွင်း ထုတ်ဝေခဲ့သည့် ဗမာ့ခေတ်သတင်းစာ၊ ဗမာသစ်စာစောင်၊ မန္တလေးသူရိယသတင်းစာ၊ မြန်မာ့အလင်းသတင်းစာ၊ သူရိယသတင်းစာနှင့် စာရေးဆရာမဂ္ဂဇင်းစသည့် ပြည်တွင်းထုတ် သတင်းစာများအပြင် ဂရိတ်တေားအေးရှားသတင်းစာ၊ ဂျပန်ပြည်ထုတ် ဆာကူရာမဂ္ဂဇင်း၊ တိုက်ယိုမဂ္ဂဇင်းတို့မှ ကောက်နုတ်ဖော်ပြပေးထားသော စာအုပ်ဖြစ်သည်။