Most Visited of ခရီးသွား / ပထဝီဝင်

ကျောက်စိမ်းမြေမှ ရေမဆေးရတနာသစ် (ရသ သုတ စာစုများ) (ကျော်ဇောဟိန်း (သစ်ထူးအိမ်)) (ခရီးသွား / ပထဝီဝင်)

ကချင်ပြည်နယ် ဖားကန့် ရတနာမြေမှ ကျောက်စိမ်းမှော်အကြောင်း၊ ကျောက်စိမ်းအကြောင်း၊ ကျောက်စိမ်းတူးဖော်ရေးလုပ်ငန်းအကြောင်း၊ မှော်မြေမှ “ရေမဆေးလူတန်းစား”များအကြောင်း၊ “ရေမဆေးရတနာသစ်”အကြောင်းတို့ကို ကဗျာ၊ ဝတ္ထု၊ ဆောင်းပါး သုတ ရသစုံလင်စွာဖြင့် ဖော်ပြပေးထားသော စာအုပ်ဖြစ်သည်။ ဖားကန့်ဒေသရှိ လူတန်းစား အသီးသီးနှင့်တကွ ဒေသ၏ စီးပွားရေး, လူမှုရေးများအကြောင်းများကို စုံစုံလင်လင် သိရှိနိုင်ကြမည့် စာအုပ်ကောင်း တစ်အုပ်ပင် ဖြစ်သည်။

ဗုဒ္ဓယဉ်ကျေးမှု အမွေအနှစ်များ စံပျော်ရာ မဇ္ဈိမဒေသ ဗုဒ္ဓဂယာ (ခရီးသွားစာပေ) (ဦးစိုးရှိန် (မောင်စိုးထိုက် - သုံးဆယ်)) (ခရီးသွား / ပထဝီဝင်)

ဗုဒ္ဓဂယာသို့ ကိုယ်တိုင်သွားရောက် ဖူးမြင်ခဲ့သူ စာရေးသူက သူမြင် တွေ့ ကြား သိခဲ့ရသည်များကို သမိုင်းအမြင်၊ သမိုင်းအတွေးဖြင့် စုံစုံစေ့စေ့ ဤစာအုပ်တွင် မှတ်တမ်းတင် ရေးသားထားသည်။ ဘုရားအဆူဆူတိုင်း၏ ပွင့်တော်မူရာ မြေမြတ်မဟာလည်းဖြစ်၊ သံဝေဇနိယ လေးဌာနတွင် ပါဝင်ပြီး ဘုရားရှင်တိုင်း၏ မစွန့်အပ်သော အဝိဇဟိတဌာနထူးလည်းဖြစ်သည့် ဗုဒ္ဓဂယာ ခရီးလမ်းအကြောင်းသာမက ခရီးလမ်းတစ်လျှောက် သွားရောက်ခဲ့သော ဗာရာဏသီ၊ မိဂဒါဝုန်၊ နယူးဒေလီ၊ သင်္ကၤဿနဂိုရ်ဒေသ၊ သာဝတ္ထိ၊ လုမနီ၊ ကုသိနာရုံ၊ ဝေသာလီ၊ ရာဇဂြိုဟ်၊ ကမ္ဘာ့ဝိပဿနာ စေတီတော်၊ ဓမ္မဂီရိရိပ်သာ၊ ဆရာကြီး ဦးဘခင် ဝိပဿနာကျေးရဂွာ၊ သီပေါဘုရင်နန်းတော်နှင့် ဂူဗိမာန်၊ မွန်ဘိုင်းမြို့၊ ကလကတ္တားမြို့ အစရှိသည့် နေရာဌာနများသို့ သွားရောက်ခဲ့စဉ်က ရရှိခဲ့သည့် ဒေသန္တရဗဟုသုတများကိုပါ ဓာတ်ပုံများစွာနှင့်တကွ ရေးသားမှတ်တမ်းတင်ထားသည်ကို တွေ့ရသည်။

အိုဘယ့် ... ပုဂံ (ရွှေကူမေနှင်း) (သမိုင်း, ခရီးသွား / ပထဝီဝင်)

ပုဂံနှင့် ပတ်သက်၍ စာရေးသူရေးသားခဲ့သည့် ခရီးသွားဆောင်းပါး ၁၁ ပုဒ်ကို စုစည်းကာ စာအုပ်အဖြစ် ထုတ်ဝေထားခြင်း ဖြစ်သည်။ မြစေတီ၊ ဗူးဘုရား၊ အာနန္ဒာ၊ ရွှေဂူကြီး၊ မြင်းကပါ၊ မနူဟာ၊ နဂါးရုံ၊ အလိုတော်ပြည့်၊ ဓမ္မရံကြီး၊ ကန်တော့ပလ္လင်၊ ဆပ္ပဒ အစရှိသည့် ပုဂံ၏ အထင်ကရ စေတီပုထိုးများ၏ နောက်ခံသမိုင်း အကျဉ်း၊ ဘုရားတည်ရခြင်း၏ ရည်ရွယ်ချက်၊ ဘုရားစေတီ တစ်ဆူချင်းစီ၏ ထူးခြားချက်၊ အနုပညာလက်ရာမြောက်ပုံများကို ဆောင်းပါးများတွင် စိတ်ဝင်စားဖွယ် ထည့်သွင်း ရေးသားထားသည်ကို တွေ့ရသည်။

ခါကာဘိုခရီးသည် (ယိမ်းနွဲ့ပါး စစ်တံခွန်အဖွဲ့ခေါင်းဆောင်၏ နယ်ခြားကိုယ်တွေ့ခရီးစဉ်များ) (မှူးသမိန်) (ခရီးသွား / ပထဝီဝင်)

မြန်မာပြည်၏ ဆွစ်ဇာလန်ဟု နာမည်ကြီးသော ခါကာဘိုသည် မြန်မာနိုင်ငံတွင်သာမက အရှေ့တောင်အာရှနိုင်ငံများတွင်ပင် အလှဆုံးနှင့် အမြင့်ဆုံး ဖြစ်သည်။ ထို့ပြင် လူသားတို့ ယနေ့တိုင် တက်ရောက်အောင်ပွဲခံနိုင်ခြင်း မရှိသေးသော ကမ္ဘာက အသိအမှတ်ပြုထားသည့် တောင်ကြီးများစာရင်းတွင် ထိပ်ဆုံးမှပါဝင်နေသေးသည်။ တောင်ဘေးပတ်လည်တွင် အလွန်ကြီးမား မက်စောက်သည့် ချောက်ကြီးရှိနေခြင်း၊ တောင်နံရံသည် မတ်လွန်း၍ ကျောက်သားပကတိ ဖြစ်နေခြင်း၊ ကျောက်တောင်ထိပ်များသည် လက်ချောင်းများကဲ့သို့ ချွန်ထက်နေခြင်း၊ ၁၂ ရာသီ ရေခဲဖုံးလွှမ်းနေခြင်း၊ ရာသီဥတုကြမ်းတမ်းခြင်းတို့ကြောင့် တောင်ထိပ်ပေါ်တက်နိုင်ဖို့ ဝေးစွ၊ တောင်ကြီးကိုမြင်ရသည့်နေရာ သို့မဟုတ် တောင်ခြေရင်းသို့ ရောက်နိုင်ရေးပင် မလွယ်ကူချေ။ ထိုသို့ ရောက်ရှိရန် ခက်ခဲလှသည့် ၎င်းဒေသကို စာရေးသူသည် နိုင်ငံတော်အစိုးရ၏ တာဝန်ပေးမှုဖြင့် ၁၉၅၅ ခုနှစ်ပတ်ဝန်းကျင်က ရောက်ရှိခဲ့ရာ သူရရှိခဲ့သည့် ရေခဲတောင်အတွေ့အကြုံများကို ဤစာအုပ်တွင် အသေးစိတ် မှတ်တမ်းတင်ရေးသားထားသည်။ ခန္တီးရှမ်းများအကြောင်း၊ နယ်ချဲ့ကိုတော်လှန်ခဲ့သည့် ဒူးလင်းဂျင်းဖောများ၊ အဖြူဝတ်စုံကိုနှစ်သက်သော ရဝမ်တိုင်းရင်းသားများ၊ မြန်မာပြည်က ဂျစ်ပစီဆိုရမည့် လှည့်လည်သွားလာနေသော လီဆူးတိုင်းရင်းသားများ၊ ပက်ဂမီဟု အမည်ပေးထားသော တရုံလူပုလေးများ၊ တောလိုက်မုဆိုးကျော် ထလုတိုင်းရင်းသားများ၊ မဟာယာနဗုဒ္ဓဘာသာကိုးကွယ်သည့် မြန်မာနိုင်ငံ၏မြောက်ဘက်အစွန်ဆုံးနေ တိဗက်တိုင်းရင်းသားများ၊ တိုင်းရင်းသားအမျိုးမျိုး၏ ယဉ်ကျေးမှုဓလေ့ထုံးစံနှင့် သူတို့ပြောသော ပုံပြင်များ၊ စွဲမက်လှပနေသည့် ဆီးနှင်းရေခဲဖုံး တောင်တန်းများ၊ အခြားဒေသနှင့်မတူ တမူထူးခြားသော ပထဝီဝင် မနုဿဗေဒ ရုက္ခဗေဒ စသည်များကို ယိမ်းနွဲ့ပါး စစ်တံခွန်အဖွဲ့ခေါင်းဆောင် ဗိုလ်မှုးကြီးစောမြင့်(ငြိမ်း)၏ နယ်ခြားကိုယ်တွေ့ခရီးစဉ်အဖြစ် ဤစာအုပ်တွင် ဖတ်ရှုကြရမည်ဖြစ်သည်။ စာရေးသူသည် ဤစာအုပ်ဖြင့် ၂ဝဝ၈ ခုနှစ်အတွက် အမျိုးသားစာပေဆု (စာပဒေသာ) ကို ရရှိခဲ့သည်။

ဗမာ (တင်ထွေး) (ခရီးသွား / ပထဝီဝင်)

အင်္ဂလိပ်တို့ မြန်မာပြည်အောက်ပိုင်းကို လုံးဝသိမ်းပိုက်ပြီး၍ အထက်ပိုင်းကို တိုက်ခိုက်သိမ်းပိုက်ရန် ကြံစည်နေသောအချိန်ကာလက မြန်မာပြည်သို့ ရောက်ရှိလာခဲ့သော အင်္ဂလိပ် ကိုလိုနီအရာရှိတစ်ဦးဖြစ်သူ ဂျိမ်းဂျော့စကော့ မြန်မာကလောင်အမည် ရွှေရိုး (Shway Yoe) ရေးသားသည့် The Burman His Life and Notions စာအုပ်ကို ဘာသာပြန်ဆိုထားခြင်း ဖြစ်သည်။ ကိုလိုနီခေတ် ဗျူရိုကရက် အရာရှိတစ်ဦးဖြစ်သော်လည်း ဗမာကလောင်အမည်ခံယူကာ ဗမာတို့ဖက်မှ ရပ်တည်၍ ရေးသားထားသော ဤစာအုပ်မှတဆင့် လွန်ခဲ့သော နှစ်ပေါင်း ရာကျော်က ဗမာကြီးများ၏ နေမှု, ထိုင်မှု, စားမှု, သွားမှု, ကိုးကွယ်ယုံကြည်မှု, ယဉ်ကျေးမှု ဓလေ့ထုံးစံများကို စိတ်ဝင်စားဖွယ် လေ့လာသိရှိကြရမည် ဖြစ်သည်။ မူရင်းစာရေးသူသည် ထိုသို့ ရေးသားနိုင်ရန်အတွက်လည်း ဗမာကြားထဲ ထဲထဲဝင်ဝင် သွားလာခဲ့သလို ဗမာတို့၏ စွဲမက်စရာများ၊ စိတ်ဝင်စားစရာများ၊ ကတ်ဖိုးကတ်ဖဲ့နိုင်မှုများ၊ လှုပ်ရှားမှုများနှင့် ပျင်းရိခြင်းများကိုပါ အသေးစိတ် လေ့လာခဲ့သည်။ ထို့ပြင် ကြည်ညိုမှုများ၊ အယူသည်းမှုများ၊ ပွဲလမ်းသဘင်များ၊ အမိန့်အာဏာများ၊ သနားကြင်နာမှုများကိုပါ သူတာဝန်ထမ်းဆောင်စဉ်အတွင်း ထိတွေ့ခဲ့ရသည့်အတွက် စာအုပ်ပါအကြောင်းအရာများသည် ပိုမိုရုပ်လုံးကြွလျက်ရှိသည် တွေ့ရှိရမည် ဖြစ်သည်။ မူရင်းစာအုပ်အပေါ် စာရေးဆရာကြီးများ၏ အမြင်ကို ဖော်ပြလိုက်ပါသည်။

အနာဂတ်တစ်ခု ဖန်တီးတည်ဆောက်ခြင်း (အေးငြိမ်း (လေးမျက်နှာ)) (ပညာရေး, ဥပဒေ, ခရီးသွား / ပထဝီဝင်)

စင်ကာပူနိုင်ငံတွင် သွားရောက် အလုပ်လုပ်မည့်သူများ၊ ကျောင်းတက်မည့်သူများ၊ လက်ရှိ ကျောင်းတက်နေသူ၊ အလုပ်လုပ်နေသူများအတွက် စင်ကာပူအစိုးရမှ ချမှတ်ထားသည့် အလုပ်သမားစည်းကမ်းများ၊ စင်ကာပူ၏ လူနေမှုစရိုက်၊ ဘာသာရေး၊ ပညာသင်ကြားရေးအပါအဝင် စင်ကာပူအကြောင်း သိကောင်းဖွယ်ရာများကို အပြည့်စုံဆုံး ဖြစ်အောင် ပြုစုရေးသားထားသော စာအုပ်ဖြစ်သည်။ အထူးသဖြင့် အလုပ်လုပ်ရာတွင် မသိမဖြစ် သိထားရမည့် Work Permit, Spass, PRအပါအဝင် အလုပ်လုပ်ခွင့်၊ နေထိုင်ခွင့်များနှင့် ပတ်သက်၍ စည်းမျဉ်းစည်းကမ်းများ၊ ပြင်ဆင်ထားရမည့် စာရွက်စာတမ်းများ၊ ဖြည့်ရသည့် ပုံစံများ၊ လျှောက်ပုံများ၊ လျှောက်ရာတွင် ဖြည့်စွက်ရသည့် အကြောင်းအရာများ၊ လုပ်ငန်းခွင် စာမေးပွဲများ၊ လခနှုန်းထားများ၊ သတိထားရမည့် အချက်များကို အတော်ပင် ပြည့်ပြည့်စုံစုံ အသေးစိတ်ရှင်းပြထားသည်ကို တွေ့ရသည်။ ထို့အတူ မူလတန်းမှသည် တက္ကသိုလ်အထိ စင်ကာပူကျောင်းများ၏ ပညာရေးစနစ်၊ ကုန်ကျစရိတ်၊ တက်ရောက်မှုများသည့် ကျောင်းများနှင့် သင်တန်းများ၏ သင်ရိုးညွှန်းတမ်းတို့ကိုလည်း ပြည့်ပြည့်စုံစုံ ရှာဖွေပြုစုပေးထားသည်။ ထို့ပြင် စင်ကာပူရောက် မြန်မာများအတွက် ဘာသာရေး၊ သွားလာရေး၊ ဘဏ်၊ ကျန်းမာရေးနှင့် ဆေးကုသမှု၊ နေထိုင်ရန်အတွက် အိမ်ခန်းငှားခြင်း အိမ်ဝယ်ခြင်းများ၊ အင်တာနက်၊ စာတိုက်အပါအဝင် ဆက်သွယ်ရေးကိစ္စရပ်များနှင့် ပတ်သက်၍ သိထားသင့်သည်များကို ရှုထောင့်စုံမှ အသေးစိတ် ရေးသားရှင်းလင်းထားသည်ကို တွေ့ရှိရမည်ဖြစ်သည်။ စာမျက်နှာ ၅ဝဝ ကျော်ပါရှိသော ဤစာအုပ်ကို စက္ကူချောသုံး၍ ရိုက်နှိပ်ထားပြီး ရောင်စုံဓာတ်ပုံများကိုပါ ထည့်သွင်းပေးထားသည်။

ထားဝယ် ခရီးသွားလမ်းညွှန် (ပါရမီစာတည်းအဖွဲ့) (ရည်ညွန်းစာပေ (အဘိဓာန် / စွယ်စုံကျမ်း / မြေပုံ / လမ်းညွှန်စာအုပ် / … ), ခရီးသွား / ပထဝီဝင်)

ကမ္ဘာကျော်ခရီးသွားလမ်းညွှန်စာအုပ် Lonely Planet ကို လေ့လာ မှီငြမ်း၍ စနစ်တကျ စီစဉ် ရေးသားထားသော စာအုပ်ဖြစ်သည်။ တည်နေရာ၊ မြေမျက်နှာပြင်နှင့် ရာသီဥတု၊ ရှင်ကိုးရှင်ဘုရားများ၏ စေတီတော်နှင့် ဆင်းတုတော်ပုံများ၊ ခေတ်ဟောင်းလက်ရာ ကြည့်စရာ၊ ထင်ရှားကျော်ကြား ထားဝယ်ပွဲတော်များ၊ မောင်းမကန်အပါအဝင် ကမ်းခြေနှင့် ကျွန်းများ၊ ရေတံခွန်များအကြောင်းအပြင် ဟိုတယ်နှင့်တည်းခိုခန်း ၄ဝ ကျော်၏ လိပ်စာနှင့် ဖုန်းနံပါတ်များ၊ ကားလက်မှတ်နှင့် လေယာဉ်လက်မှတ်များကို ဖုန်း၊ အွန်လိုင်းတို့မှ ဝယ်ယူနိုင်သော အချက်အလက်များ၊ စားသောက်ဆိုင် ၃ဝ ကျော်နှင့် အခြားခရီးသွားဝန်ဆောင်မှု ၅ဝ ကျော်၏ လိပ်စာများ၊ ကိုယ်ပိုင်ကားဖြင့်သွားသူများ ရန်ကုန် - ထားဝယ်ခရီး၌ ဘယ်အချိန် ဘယ်မြို့ကို ရောက်နိုင်သည် အစရှိသည့် ထားဝယ်သို့ လာရောက်မည့်သူများအတွက် အချက်အလက်များကိုပါ ထည့်သွင်းပေးထားသည်။ ထို့ပြင် ထားဝယ်မရောက်မီ ကြိုတင်လေ့လာနိုင်ရန် အသုံးများသော ထားဝယ်စကားနှင့် ဒေသိယအခေါ်အဝေါ်များကို ထည့်သွင်းထားသည့်အတွက် ထားဝယ် ဒေသန္တရဗဟုသုတနှင့် သတင်းအချက်အလက်များကို တစ်အုပ်တည်းဖြင့် အစုံအလင် ဖတ်ရှုလေ့လာနိုင်မည့် စာအုပ်ဖြစ်သည်။

မာကိုပိုလို (ဦးလှဒင်) (ခရီးသွား / ပထဝီဝင်)

ဒုတိယကမ္ဘာစစ်မတိုင်မီကာလက မြန်မာပြည်အရပ်ရပ်၌ အရေးပိုင်အဖြစ် အမှုထမ်းခဲ့သူ Maurice Collis ရေးသားသည့် Marco Polo စာအုပ်ကို ဘာသာပြန်ဆိုထားခြင်း ဖြစ်သည်။ ပုဂံခေတ် ခရစ် ၁၂၇ဝ ပြည့်နှစ်ခန့်က ရောမတိုင်း ဗင်းနစ်မြို့မှ တရုတ်ပြည်သို့ ခရီးထွက်ခွာခဲ့သူ မာကိုပိုလို၏ ခရီးသွားမှတ်တမ်းကို ရာဇဝင်ကြောင်း၊ ပထဝီဝင်ကြောင်း၊ ဘာသာ သာသနာဝင်ကြောင်း အထောက်အထား အကိုးအကားများစွာဖြင့် ဤစာအုပ်တွင် ဖတ်ရှုလေ့လာကြရမည် ဖြစ်သည်။ အထူးသဖြင့် ဥရောပတိုက်တွင် မပေါ်သေးသော ကျောက်မီးသွေး၊ ယမ်းမှုန့်နှင့် မီးခံမြေ အသုံးချနည်းများ၊ နရသီဟပတော့မင်းလက်ထက် တရုတ်တရက်လူမျိုးများ ပုဂံပြည်သို့ ဝင်ရောက်တိုက်ခိုက်စဉ်က မျက်မြင်ကိုယ်တွေ့အတွေ့အကြုံများ၊ မွန်ဂိုဘုရင်၏ တရုတ်ပြည် (ယူနန်)ကို တိုက်ဆင် ၈ ထောင်ပါသော မြန်မာတပ်ဝင်ရောက်တိုက်ခိုက်စဉ်က အတွေ့အကြုံများ၊ မြေထဲပင်လယ်ကမ်းခြေမှသည် အရှေ့ပစိဖိတ် သမုဒ္ဒရာကမ်းခြေတိုင်အောင် အလွန်ကျယ်ပြန့်လှသာ မွန်ဂိုအင်ပါယာကြီးကို ကူဗလိုင်ခန် ဧကရာဇ် မည်သို့စီမံအုပ်ချုပ်ခဲ့ပုံများ၊ ကူဗလိုင်ခန်က ဗုဒ္ဓမြတ်စွယ်တော်ကို သယ်ယူပင့်ဆောင်ရန် မာကိုပိုလိုအား သီဟိုဠ်နိုင်ငံသို့ သံစေလွှတ်ခဲ့စဉ်က သူဖြတ်သန်းခဲ့သည့် မြန်မာ၊ အင်ဒိုချိုင်းနား၊ အင်ဒိုနီးရှား၊ စင်ကာပူ၊ ယူနန်၊ ကပ္ပလီကျွန်းစု၊ သီဟုဠ်နှင့် အိန္ဒိယတို့၌ တွေ့မြင်ခဲ့ရသည်များ၊ မြတ်စွာတော်ကို တရုတ်ပြည်သို့ ပင့်ဆောင်ပုံ၊ စွယ်တော်စစ် မစစ်ပြဿနာ၊ သီဟိုဠ်၌ စွယ်တော်တု၊ စွယ်တော်ပွားများ များပြားလှပုံများကို ဗဟုသုတဖြစ်ဖွယ် ဖတ်ရှုလေ့လာ သိရှိကြရမည် ဖြစ်သည်။

သူ့လက်ရာ၊ သူအယူအဆ၊ သူ့စာပေ၊ သူ့အတွေးအမြင် (မြသန်းတင့်) (အတ္ထုပ္ပတ္တိ / ကိုယ်တွေ့မှတ်တမ်း, ကဗျာ / အက်ဆေး / ပေးစာ / မိန့်ခွန်း / ဟောပြောချက်, ခရီးသွား / ပထဝီဝင်, ဝတ္ထုတို)

အရှေ့တိုင်းစာပေ၊ အနောက်တိုင်းစာပေ၊ ခေတ်ပေါ်စာပေ၊ ဂန္ထဝင်စာပေ အစရှိတဲ့ စာပပုံစံများစွာ စာအုပ်များစွာကို မြန်မာစာပေလောကနှင့် နီးစပ်စေခဲ့သူ ဆရာမြသန်းတင့် ရေးသားခဲ့သည့် ဘာသာပြန်ဝတ္ထုတို၊ ပင်ကိုယ်ရေးဝတ္ထုတို၊ ဘာသာပြန်ကဗျာ၊ ပင်ကိုယ်ရေး ရသစာတမ်း၊ ပင်ကိုယ်ရေးကဗျာ၊ ခရီးသွားစာပေ၊ ရုပ်ပုံလွှာ၊ အမှာစာ၊ ဆောင်းပါး၊ အင်တာဗျူး၊ ပြဇာတ်များမှ ရသ၊သုတ၊ဒဿန၊စာပေလက်ရာအစုံ ကောင်းနိုးရာရာများကို ရသများကို စုံလင်စွာ ဖတ်ရှုနိုင်အောင် စုစည်းပေးထားခြင်းဖြစ်သည်။ ယခင်က “မြသန်းတင့်၏ စာပေါင်းစု” အမည်ဖြင့် ထုတ်ဝေခဲ့သော စာအုပ်ကို အမည်ပြောင်း ထုတ်ဝေထားခြင်း ဖြစ်သည်။

အလောင်းတော်ကဿပ (အမျိုးသားပညာဝန် ဦးဖိုးကျား) (သမိုင်း, ခရီးသွား / ပထဝီဝင်)

လူနေနှင့် အလွန်ဝေးလံ၍ တောတောင်အလွန်ကြီးမားခြင်း၊ တောင်ခြေမှ အလောင်းတော်အရောက် ခြေကျင်ခရီးသက်သက်ပင် ၁၇ မိုင်ကျော် အတက်အဆင်း ခရီးရှိခြင်း၊ လမ်းတွင် တစ်ညအိပ်ရသည်အထိ ခရီးရှိခြင်း၊ လူသူမနီးသော တောကြီးတောင်ကြီးလမ်းကို ဖြတ်သွားခြင်း၊ တစ်နှစ်လုံးမှ ပွဲတော်ချိန် ၃ လကျော်သာ သွားလာနိုင်ခြင်းတို့ကြောင့် မြန်မာပြည်တစ်လွှားတွင် ထင်ရှားကျော်ကြားသော အလောင်းတော်ကဿပ ခရီးသွားမှတ်တမ်းဖြစ်သည်။ အလောင်းတော်ကဿပသို့ ကိုယ်တိုင်သွားရောက်လေ့လာခဲ့သူ အမျိုးသား ပညာဝန် ဦးဖိုးကျားက ဤအလောင်းတော်ကဿပမှာ ဘုရားရှင်လက်ထက်တော်တွင် ပေါ်ထွန်းခဲ့သော အရှင်မဟာကဿပ အလောင်းတော်မဟုတ်ဘဲ မြန်မာနိုင်ငံမှ ပေါင်းလောင်ရှင်ကဿပ ပရိနိဗ္ဗာန်ပြုရာမှ ကြွင်းကျန်ရစ်သော အလောင်းတော်ဖြစ်သည်ဟု ဆိုသည်။ ဦးဖိုးကျားသည် အဘယ်သို့သော အချက်များကြောင့် ဤသို့ဆိုရသည်ကို အထောက်အထားများဖြင့် ဤစာအုပ်များတွင် ထောက်ပြထားသည့်အပြင် အလောင်းတော်ကဿပ တည်ရာအရပ်နှင့် သွားရာလမ်းများ၊ တည်နေပုံ၊ ရာဇဝင်များကိုပါ အသေးစိတ် ဖော်ပြထားသည်။