Most Visited of မင်းဗေဒါ (ပွင့်ဖြူ)

ချင်းတွင်းရွှေပြည် မြားမြစ် သလ္လာဝတီ (မင်းဗေဒါ (ပွင့်ဖြူ)) (ခရီးသွား / ပထဝီဝင်)

ဧရာဝတီမြစ်၏ အကြီးဆုံး၊ အားကောင်းမောင်းသန်အရှိဆုံး လက်ရုံးမြစ်ကြီးတစ်စင်းဖြစ်သလို နှစ်စဉ် ဧရာဝတီမြစ်တွင်းသို့ နှုန်းတင်မြေနုမြေဆီ တန် သန်း ၁ဝဝ ကျော် သယ်ယူပို့ဆောင်ပေးလျက်ရှိသည့် ချင်းတွင်းမြစ်ကြောတစ်လျှောက် စာပေခရီးတစ်ခုကို စာရေးဆရာ ချစ်စံဝင်း၏ ဦးဆောင်မှုဖြင့် စာပေ၊ အနုပညာ၊ ပန်းချီဆရာ၊ ဓာတ်ပုံဆရာ၊ ကာတွန်းဆရာ၊ ဂီတပညာရှင်များ စုစုပေါင်းအားဖြင့် အဖွဲ့ဝင် ၆ဝ ကျော် ပါဝင်သည့်အဖွဲ့သည် ပြုလုပ်ခဲ့ရာ ယခုစာအုပ်မှာ ထိုခရီးစဉ်၏ မှတ်တမ်းစာအုပ်ဖြစ်သည်။ ထိုအဖွဲ့သည် ချင်းတွင်းမြစ်ကြောတစ်လျှောက်ကို မုံရွာမှ ခန္တီးထိ အဆန်ခရီး၊ ထိုမှတဖန် မုံရွာအထိ အစုန်ခရီး ပြုလုပ်ခဲ့ကြပြီး မြစ်ကြောတစ်လျှောက်ရှိ ကနီ၊ ကလေးဝ၊ ဖောင်းပြင်၊ ထမံသီ၊ ဟုမ္မလင်း၊ မော်လိုက်၊ မင်းကင်းမြို့များကို ဝင်ရောက်၍ ဒေသခံများနှင့် ရင်းရင်းနှီးနှီးတွေ့ဆုံကာ အတွေ့အကြုံများ မျှဝေခဲ့ကြသည်။ ယခုစာအုပ်တွင် ချင်းတွင်း၏ သမိုင်းကြောင်း၊ မြစ်ကြောတစ်လျှောက်ရှိ မြို့များကို ဝင်ရောက်စဉ် တွေ့မြင်ရသည့် မြင်ကွင်း၊ ချင်းတွင်းမြစ်၏ သဘာဝ ပတ်ဝန်းကျင်အခြေအနေ၊ မြစ်ကြော ထိန်းသိမ်းစောင့်ရှောက်ရေးနှင့် ပတ်သက်၍ မျက်မြင်တွေ့ရှိခဲ့သည်များ၊ ချင်းတွင်းစာပေခရီး စာပေဟောပြောပွဲ အတွေ့အကြုံများကို မှတ်တမ်းတင်ဓာတ်ပုံများနှင့်အတူ စိတ်ဝင်စားဖွယ် မှတ်တမ်းတင် ရေးသားထားသည်။

ရွှေမြန်မာရင်တွင်းမှ မြစ်မင်းဧရာဝတီ (မင်းဗေဒါ (ပွင့်ဖြူ)) (ခရီးသွား / ပထဝီဝင်)

၁၉၈၈ ခုနှစ် မတ်လနှင့် ဧပြီလများတွင် စာရေးသူပါဝင်သော ဧရာဝတီစာပေခရီးအဖွဲ့သည် ဧရာဝတီမြစ်၏အစ မေခ၊ မေလိခမြစ်ဆုံမှ မြစ်ဝကျွန်းပေါ် မအူပင်အထိ ရေလမ်း ၁ဝ၃၃ မိုင်ခရီးကို စုန်ဆင်းခဲ့ကြသည်။ ထိုအဖွဲ့တွင် စာရေးသူ စာပေလေ့လာရေးသူအဖြစ်လည်းကောင်း၊ ရုပ်မြင်သံကြား ရိုက်ကူးထုတ်လုပ်သူ အဖြစ်လည်းကောင်း ခရီးစဉ်အစအဆုံး လိုက်ပါခဲ့သည်။ ခရီးစဉ်တစ်လျှောက်လုံး တွေ့ကြုံရသမျှကို ရုပ်/မြင်မှတ်တမ်းအဖြစ် တည်းဖြတ်ထုတ်ဝေခဲသလို ယခုကဲ့သို့ စာအုပ်အဖြစ်လည်း မှတ်တမ်းတင် ရေးသားလိုက်ခြင်းဖြစ်သည်။ ဧရာဝတီကို ချစ်တတ်ရေး၊ ဧရာဝတီကို အသိအမှတ်ပြုရေး၊ ဧရာဝတီကို အစွမ်းကုန် အသုံးချရေး၊ ဧရာဝတီကို ထိန်းသိမ်းမြှင့်တင်ရေးအတွက် ရေးသားထားသော ဤစာအုပ်တွင် မြစ်ကြောတစ်လျှောက် မြင်တွေ့ခဲ့ရသည်များ၊ ဧရာဝတီကို သမိုင်းစဉ်တစ်လျှောက် အသုံးချခဲ့သည်များ၊ မြစ်ကြောတစ်လျှောက်ရှိ အထင်ကရမြို့များနှင့် ဧရာဝတီမြစ်၏ ဆက်စပ်မှု၊ ဧရာဝတီမြစ်၏ အချို့နေရာများတွင် တိမ်ကော ပျက်စီးလာမှုများ၊ မြစ်ကြောတစ်လျှောက် ထိန်းသိမ်းရေး အရေးတကြီးလိုအပ်နေပုံ၊ ပလစ်စတစ်အပါအဝင် အမှိုက်များကြောင့် ဧရာဝတီပျက်စီးနေပုံ၊ ဧရာဝတီမြစ်ထဲသို့ သဲနှုန်းများ ဝင်ရောက်လာနှုန်း အစရှိသည်တို့ကို အချက်အလက်များနှင့်တကွ ပြည့်ပြည့်စုံစုံ ရေးသားမှတ်တမ်းတင်ထားသည်။

နိုင်ငံတော် နိုင်ငံသား နိုင်ငံရေးနှင့် ဒီမိုကရေစီကျင့်စဉ် (မင်းဗေဒါ (ပွင့်ဖြူ)) (နိုင်ငံရေး)

မြန်မာပြည် လွတ်လပ်ရေး ရသည့်အချိန်မှစတင်ကာ ဗိုလ်ချုပ်နေဝင်း အာဏာသိမ်းခဲ့သည့် ၁၉၆၂ ခုနှစ်အထိ မြန်မာ့ဒီမိုကရေစီ ဖြစ်စဉ်များနှင့် ယနေ့ပြည်သူများ သဘောပေါက်ထားသင့်သည့် ဒီမိုကရေစီ၏ သဘောတရားတို့ကို ပြည့်ပြည့်စုံစုံ ဖော်ပြထားသော စာအုပ်ဖြစ်သည်။ စာအုပ်ကို ဒီမိုကရေစီဖြစ်စဉ်၊ သမိုင်းထဲက မြန်မာ့ဒီမိုကရေစီ၊ နိုင်ငံတော် နိုင်ငံသား နိုင်ငံရေးနှင့် ဒီမိုကရေစီကျင့်စဉ်ဟူ၍ အပိုင်း ၃ ပိုင်းခွဲ တင်ပြထားသည်။ မြန်မာနိုင်ငံတွင် ကျင့်သုံးခဲ့သော ဒီမိုကရေစီဟူသော ခေါင်းစဉ်အောက်တွင် မျက်မှောက်အခြေအနေများကို အဆင့်ဆင့် နားလည်လွယ်အောင် ဖော်ပြထားပြီး ဒီမိုကရေစီကျင့်စဉ်အကြောင်းကိုလည်း တိုတိုရှင်းရှင်းနှင့် လိုရင်းရောက်အောင် ပြုစုထားသည့် စာအုပ်ဖြစ်သည်။

စာရွက်ပေါ်မှာ ရုပ်ရှင်ရိုက်ခြင်း (ရုပ်ရှင်ဇာတ်ညွှန်း အနုပညာလေ့လာချက်) (မင်းဗေဒါ (ပွင့်ဖြူ)) (အနုပညာ / ဖျော်ဖြေရေး)

ရုပ်ရှင်ဇာတ်ညွှန်းပညာသမိုင်း၊ ကမ္ဘာ့ရုပ်ရှင်ဇာတ်ညွှန်းသမိုင်း၊ မြန်မာ့ရုပ်ရှင် ဇာတ်ညွှန်းသမိုင်း၊ ရုပ်ရှင်ဇာတ်ညွှန်းပညာအကြောင်း၊ ရုပ်ရှင်ဇာတ်ညွှန်းဖွဲ့စည်း တည်ဆောက်ပုံ၊ သမားရိုးကျ ဇာတ်ညွှန်းဖွဲ့စည်းတည်ဆောက်ပုံ၊ စီမံခန့်ခွဲမှုပါဝင်သော ဇာတ်ညွှန်း၊ ဇာတ်ညွှန်းရောင်းချခြင်းစသည်ဖြင့် ဇာတ်ညွှန်းနှင့်ပတ်သက်ပြီး ကမ္ဘာ့ရုပ်ရှင်၊ မြန်မာ့ရုပ်ရှင်တို့ကို ကိုးကား၍ သုတေသန ပြု ရေးသားထားသော စာအုပ်ဖြစ်သည်။ စာရေးသူသည် ဤစာအုပ်ဖြင့် စာပေဗိမာန်စာမူဆုပြိုင်ပွဲတွင် မြန်မာ့ယဉ်ကျေးမှုနှင့် အနုပညာဆိုင်ရာစာပေ (တတိယဆု)ကို ဆွတ်ခူးနိုင်ခဲ့သည်။