New Arrivals of ခရီးသွား / ပထဝီဝင်

နိုင်ငံခြားခရီးသွားလမ်းညွှန် (Foreign TraVel Guide) (နိုင်ငံပေါင်း ၆၀ ကျော် သွားရောက်ခဲ့ဖူးသည့် Travel Blogger “Nu Myat around the World” ၏ ခရီးသွားအကြံပေးချက်များ) (ဒေါက်တာနုမြတ်သိင်္ဂီဦး) (ခရီးသွား / ပထဝီဝင်)

နိုင်ငံပေါင်း ၆၀ ကျော် သွား‌ရောက်ခဲ့ဖူးသည့် Travel Blogger တစ်ဦးဖြစ်သူ စာရေးသူ၏ ခရီးသွားအကြံပေးချက်များကို ဖတ်ရှုကြရမည့် စာအုပ်ဖြစ်သည်။ Passport လုပ်နည်းမှ စ,တင်ကာ ခရီးစဉ်ဆွဲနည်း၊ ဗီဇာလျှောက်နည်း၊ လေယာဉ်စီးနည်း၊ လေဆိပ်လမ်းညွှန်၊ လူဝင်မှုကြီးကြပ်ကောင်တာ ဖြတ်ကျော်နည်း၊ Google Maps အပါအဝင် အသုံးဝင်သည့် Applicationများ အသုံးပြုနည်း အစရှိသည်တို့ကို စာရေးသူက သူ၏ ခရီးသွားအတွေ့အကြုံများပေါ် အခြေတည်၍ ရေးသားအကြံပြုရှင်းလင်းထားသည်။

ပုခန်းနယ်တစ်ခို လွမ်းစရာပို ပခုက္ကူ၊ မြိုင်၊ ရေစကြို (မောင်မျိုးဆင့် (မြန်မာစာ)) (ခရီးသွား / ပထဝီဝင်)

ဧရာဝတီမြစ်နှင့် ချင်းတွင်းမြစ်ဆုံရပ်ဝန်းနှင့် အနောက်ဘက်ခြမ်းဒေသဖြစ်သည့် ပခုက္ကူ၊ မြိုင်၊ ရေစကြို၏ ပထဝီအနေအထား၊ ရှေးအဆက်ဆက် သမိုင်းဝင်မြို့တော်ဖြစ်သည့် ပုခန်းမြို့၏ သမိုင်းကြောင်း၊ ပုခန်းနယ်မှ ရှေးဟောင်းသုတေသန အမွေအနှစ်များအကြောင်း၊ ဒေသခံတို့၏ ရိုးရာအစဉ်အလာနှင့် လက်မှုပညာများ၊ အနုလက်ရာ ရှေးမြန်မာပန်းချီလက်ရာများ၊ ဗုဒ္ဓသာသနာထွန်းကားခဲ့ရာ ရှေးဟောင်းကျောင်းကန်များ၊ မြိုင်တစ်ဝိုက်မှ ထင်ရှားနေရာဒေသများ၊ ပခုက္ကူ၊ မြိုင်၊ ရေစကြိုဒေသမှ ပေါ်ထွန်းခဲ့သည့် သာသနာ့ဝန်ထမ်း ရဟန်းတော်များ အစရှိသည်တို့ကို ဗဟုသုတဖြစ်ဖွယ် ဖတ်ရှုကြရမည့် စာအုပ်ဖြစ်သည်။

လွမ်းရပါသည် မြို့ရွှေဝယ်မြေ မောင်းမကန်နှင့် သုတ၊ ရသ၊ ခရီးသွားစာစုများ (မောင်မောင်စိုး (ထားဝယ်)) (ခရီးသွား / ပထဝီဝင်)

ဇာတိမြေ ထားဝယ်နှင့် ပတ်သက်၍ စာရေးသူ ရေးသားခဲ့သည့် ခရီးသွားဆောင်းပါးများ၊ ထားဝယ်ယဉ်ကျေးမှုဆိုင်ရာ ဆောင်းပါးများ၊ ထားဝယ်ရိုးရာဓလေ့ပွဲတော်များအကြောင်း ဆောင်းပါးများ၊ ထားဝယ်ဒေသအတွင်းရှိ ထူးခြားနေရာဒေသအကြောင်းဆောင်းပါးများနှင့် အခြားဒေသခရီးသွားဆောင်းပါးများကို စုစည်း၍ စာအုပ်အဖြစ် ထုတ်ဝေထားခြင်း ဖြစ်သည်။

လမ်းမများ ခြေသံများ အိပ်မက်များ (ကေဇော်မိုး) (ခရီးသွား / ပထဝီဝင်)

စာရေးသူ ရေးသားသည့် ခရီးသွားဆောင်းပါး (၁၀) ပုဒ် စုစည်းမှု စာအုပ်ဖြစ်သည်။

ရန်ကုန်မြို့တွင်း အထင်ကရနေရာများ လမ်းညွှန် (၂၀၂၄ - နှစ်ဦးပိုင်း) (သာဉာဏ် (ရန်ကင်း)) (ခရီးသွား / ပထဝီဝင်)

ရန်ကုန်မြို့သို့ အလည်လာမည့်သူများ၊ အခြေချနေထိုင်မည့်သူများအတွက် ဤစာအုပ်တွင် ရန်ကုန်မြို့တွင်း အထင်ကရနေရာများ၊ သမိုင်းဝင်နေရာများ၊ လည်ပတ်ရန်နေရာများ၊ မြည်းစမ်းသင့်သော စားသောက်ဆိုင်များကို သမိုင်းအကျဉ်း၊ လမ်းညွှန်၊ ဓာတ်ပုံများနှင့်တကွ ရေးသားရှင်းလင်းထားသော စာအုပ်ဖြစ်သည်။ ယခုစာအုပ်ကို ခရီးသွားလမ်းညွှန်စာအုပ်ဟု ခေါင်းစဉ်တပ်ထားသော်လည်း အနယ်နယ်အရပ်ရပ်မှ ရန်ကုန်မြို့သို့ လာရောက်ကြမည့်ခရီးသွားများအပြင်ရန်ကုန်မြို့နေသူများ အတွက်ပါ အသုံးဝင် တန်ဖိုးရှိလိမ့်မည်ဟု ယုံကြည်ကြောင်း၊ ဤစာအုပ်ပါ အချက်အလက်များ မမှားမယွင်း မလွဲချော်စေရန် စာအုပ်စာတမ်းပေါင်း မြောက်မြားစွာ၊ လူပုဂ္ဂိုလ်ပေါင်းများစွာထံမှ အချက်အလက်များကို ရယူစုဆောင်း မှတ်တမ်းပြု ရေးသားရသည်ဟု ဆိုထားသည်။

စာဆိုတော် ဦးနု၏ ဘင်္ဂလားသွားမှတ်တမ်း (မောင်သန်းဝင်း (ရန်ကုန်တက္ကသိုလ်)) (ခရီးသွား / ပထဝီဝင်)

စာဆိုတော်ဦးနုသည် ကုန်းဘောင်ခေတ် ဘိုးတော်ဘုရား(ဗဒုံမင်း) (၁၇၄၅-၁၈၁၉) လက်ထက်တွင် ထင်ရှားခဲ့သော စာဆိုပညာရှိတစ်ဦး ဖြစ်ပြီး ‘ရွှေတောင်သာဂသူ’ ဟူသော မင်းပေးဘွဲ့ ချီးမြှင့်ခံရသည်။ ရမ္မာဝတီ(ရမ်းဗြဲ)မြို့ဝန်၊ အကောက်ဝန်၊ အထောက်တော် အဖြစ်လည်း အမှုထမ်းခဲ့သည်။ စာဆိုတော် ဦးနုသည် ဘိုးတော်ဘုရားလက်ထက် သက္ကရာဇ် ၁၁၆၇ ခု၊ နတ်တော်လဆန်း ၁ဝ ရက်၊ စနေနေ့ (၃၀ နိုဝင်ဘာ ၁၈ဝ၅) တွင် အမရပူရနေပြည်တော်မှ ဘင်္ဂလားသို့ သွားခဲ့သည့် ခရီးသွားအတွေ့အကြုံများနှင့် အတွေးအမြင်များကို အခြေခံကာ ခရီးစဉ်မှတ် လင်္ကာမှတ်တမ်းတစ်စောင် ရေးသားခဲ့သည်။ ၎င်းမှတ်တမ်းသည် မြန်မာ့ခရီးသွားမှတ်တမ်းစာပေနယ်၌ အစောဆုံး နိုင်ငံခြားသွားမှတ်တမ်းဖြစ်ကာ မဟာစည်သူ ဦးရွဲ၏ ‘ဘင်္ဂလားသွားစာတမ်း’ ထက် ၂၈နှစ်၊ ကင်းဝန်မင်းကြီး၏ ‘လန်ဒန်သွား နေ့စဉ်မှတ်စာတမ်း’ ထက် ၆၇ နှစ်၊ ‘ပြင်သစ်နိုင်ငံသွား နေ့စဉ်မှတ်တမ်း’ ထက် ၆၉ နှစ်၊ မြောင်လှမြို့စား မြန်မာသံတော်ဆင့် ဦးခြိမ့်၏ ‘ပူတကေ စပိန်အီတာလျံသွားမှတ်တမ်း’ ထက် ၇၂ နှစ် စောသည်ဟု ဆိုကြသည်။ ထိုသို့ သက်တမ်း (၂၂၀) ရှိပြီဖြစ်ပြီး စိတ်ဝင်စားဖွယ်ကောင်းလှသည့် ခရီးသွားမှတ်တမ်းကို ထိုခေတ်ထိုကာလ မြင်ကွင်းများနှင့်အတူ ဤစာအုပ်တွင် ဖတ်ရှုကြရမည် ဖြစ်သည်။

ဆာကူရာထက် လှပါစေ (လူခါး) (ခရီးသွား / ပထဝီဝင်)

ဂျပန်နိုင်ငံမှာ အလုပ်လုပ်ကိုင်နေကြသည့် မြန်မာရွှေ့ပြောင်းအလုပ်သမားများ လူမှုဘဝနေထိုင်မှုတွေတွင် အဆင်ပြေကြသူများရှိသလို သေချာမလေ့လာ နားမလည်ဘဲ ရောက်လာကြသည့် မြန်မာအချို့အတွက်ကတော့ နေထိုင်စားသောက်တာကစ၍ ခက်ခဲပင်ပန်းမှု၊ အလုပ်ပင်ပန်းမှု၊ စိတ်ပင်ပန်းမှု၊ ဂျပန်ရောက် မြန်မာများ၏ လူလူချင်း အမြတ်ထုတ်မှုများ ခံရသည့်အပြင် ယုံကြည်လွယ်သူ ရိုးသားသူတွေအတွက် ဘဝပါဆုံးရနိုင်ပုံကို ‘နန်း’ ဆိုသည့် ဇာတ်ကောင်ဖြင့် ဇာတ်အိမ်တည်ထားသော ဝတ္ထုဖြစ်သည်။

ကျွန်မနှင့် ကိုရီးယား (나의 한국 생활 이야기) (မြန်မာ + ကိုရီးယား) (သက်ရတနာခင် (koreanwithme99) (지혜 지음)) (ခရီးသွား / ပထဝီဝင်)

YUFL တွင် ရုရှားဘာသာ အဓိကဖြင့် တက်ရောက်ခဲ့သော်လည်း ဝါသနာအရ ကိုရီးယားဘာသာစကားကို လေ့လာလိုက်စားမိရာမှ ထူးချွန်မှုကြောင့် ကိုရီယားနိုင်ငံတွင် ပညာဆုရှိခဲ့သူ စာရေးသူက သူ၏ ဘာသာစကားအတွေ့အကြုံများ၊ ကိုရီးယားရောက် ပညာသင်အတွေ့အကြုံများ၊ မျှဝေလိုသည့် အတွေးများ၊ ပညာသင်ရင်း ရင်းနှီးကျွမ်းဝင်ခဲ့ရသည့် သူငယ်ချင်းများအကြောင်းကို မျှဝေရေးသားထားခြင်း ဖြစ်သည်။ စာအုပ်ကို မြန်မာလိုတစ်အုပ်၊ ကိုရီးယားလိုတစ်အုပ်အနေဖြင့် ရေးသားထားသည်။

မီးလောင်မြေ (မြသန်းတင့်) (ခရီးသွား / ပထဝီဝင်)

Edgar Snow ရေးသားသည့် Scorched Earth စာအုပ်ကို ဘာသာပြန်ဆိုထားခြင်း ဖြစ်သည်။ အဂ္ဂါစနိုးသည် မူရင်းဝတ္ထု ရေးသားရန်အတွက် တရုတ် - ဂျပန် စစ်ပွဲကာလအတွင်း တရုတ်ပြည်၌ ကိုယ်တိုင်သွားရောက်လေ့လာပြီး ရေးသားထားခြင်း ဖြစ်သည်။ ခရီးသွား မှတ်တမ်းတစ်ခုလိုသာမက ဝတ္ထုတပုဒ်လို ဖတ်ကောင်းရုံသာမက နိုင်ငံရေး ကျမ်းတစောင်လိုလည်း အရေးထား ဖတ်ရှုရသည့် စာအုပ်လည်း ဖြစ်သည်။ သူ မြင်တွေ့သိရှိရသည်များကို အမှန်အတိုင်း ရေးသောကြောင့် အမေရိကန် အစိုးရ၏ ငြိုငြင်ခြင်းကိုပင် ခံခဲ့ရသည်ဟုဆိုသည်။ စာအုပ်တွင် စစ်၏ ဘက်နှစ် ဖက်၊ စစ်၏ ကြောက်စရာ ကောင်းပုံ၊ ကြမ်းကြုတ် ရက်စက်ပုံ၊ တရုတ် ပြည်သူတို့၏ ဇွဲ သတ္တိနှင့် မဆုတ်မနစ်သော လုံ့လ၊ အလွန် အင်အားချည့်နဲ့သော တိုင်းပြည်တစ်ပြည်က မိမိထက် စစ်အင်အား အဆမတန် သာလွန် ကြီးမားသော နိုင်ငံကြီး တစ်နိုင်ငံကို စည်းလုံး ညီညွတ်မှုဖြင့် တိုက်ခိုက်နိုင်ကြောင်းကို ပြသခဲ့ပုံ၊ ဂျပန် ဖက်ဆစ် ဝါဒ ပေါ်ပေါက်လာပုံ၊ ဖက် ဆစ်ဝါဒအောက်တွင် ဂျပန်ပြည်သူတို့ ဖိနှိပ်ခံရပုံ၊ တရုတ်ပြည်စစ်ပွဲတွင် ဘေးကထိုင်ကြည့်ကာ ဂျပန်ကို မျက်နှာချို သွေးနေကြသည့် အနောက်နိုင်ငံကြီးများ၏ လုပ်ရပ်တို့ကို ပွင့်ပွင့်လင်းလင်း ဝေဖန်ဖော်ထုတ် ရေးသား ထားသည်။

ရာဟုလာသံကိစ္စည်း ဃူမက္ကရသျှတ္တရ (ခြေသလုံးအိမ်တိုင် ခရီးလှည့်လည်သွားလာခြင်း) (ပါရဂူ) (ခရီးသွား / ပထဝီဝင်)

၂၀ ရာစု မဟာခရီးသည်အဖြစ် အိန္ဒိယတစ်နိုင်ငံလုံးသို့ လှည့်လည်သွားလာခဲ့ရုံသာမက နိုင်ငံခြားတိုင်းပြည်သို့ပါ ရောက်ရှိခဲ့သူ ဤစာအုပ်တွင် ခရီးသွားလာလှည့်လည်ခြင်းကျင့်စဉ်အကြောင်း၊ ဆောင်ရန် ရှောင်ရန်များကို သူ၏ ခရီးသွားအတွေ့အကြုံနှင့်အတူ စိတ်ဝင်စားဖွယ် ရှင်းလင်း ရေးသားထားသည်။