Editor's choices of နေဝင်းမြင့်

၁၈ ယူဇနာ မဂ္ဂဇင်းဝတ္ထုရှည်များ (နေဝင်းမြင့်) (ဝတ္ထုရှည်)

မဂ္ဂဇင်းများတွင် ရေးသားခဲ့သော စာရေးသူ၏ ဝတ္ထုရှည်များအနက် ၁၈ ပုဒ်ကို စာရေးသူကိုယ်တိုင် စိတ်ကြိုက်ရွေးချယ်စုစည်း၍ ထုတ်ဝေထားခြင်းဖြစ်သည်။ စရိုက်ဖွဲ့များကို အားသန်သည့် စာရေးသူက ဤဝတ္ထုရှည်များကို လောကသဘာဝ လူ့သဘာဝ တို့ချင် ခတ်ချင် ပုတ်ချင် နှိုးချင်သည့် စိတ်ကလေးများဖြင့် ရေးသားထားသည်ဟုဆိုသည်။ ထဘီဖာ လိုပါသေးရဲ့၊ တစ်ဘက်ဖာ လိုပါသေးရဲ့၊ ရတနာပုံမ်ညများ၊ ရေချိုးဆိပ်၊ တချို့က နီပြာပြာ၊ တချို့က ဖြူဝါဝါ၊ တချို့မှာ ချိတ်ပွင့်၊ တချို့မှာ ပန်းရင့်၊ မီးကင်းစောင့်၊ သေရေ ဖောက်ကားသူများ၊ အဿဗန္ဓက ည၊ ကွဲအက်နာရီ၊ ရထား၊ ရွှေရိုးငကြည်၊ ပင်လယ်သေ၊ ရတနာဂီရိ နှင်းခါးညများ၊ သမန်းကုန်းဆော့ဖ်ဝဲ၊ ကြည်းတောသူ၊ ဂီလာနဂီတ၊ သူငယ်နာ ဣစ္ဆာသယအစရှိသည့် ဝတ္ထုရှည်များ ဖြစ်ကြသည်။ “နေဝင်းမြင့်၏ ဝတ္ထုများသည် ဘဝသရုပ်ဖော်များ ဖြစ်သည့်တိုင် သရုပ်ဖော်သက်သက်မျှသာမက ခေတ်ပြိုင်ဘဝနှင့် ယှဉ်၍ စဉ်းစားစရာ တွေးတောစရာ အမြဲပါတတ်သည်။ နေဝင်းမြင့်၏ ရင်ထဲမှ ဟာသသည် ပုန်းကွယ်နေသည်။ သို့ရာတွင် သူ့ဟာသသည် နူးညံ့သိမ်မွေ့သည့် ဟာသ၊ လွမ်းစရာကောင်းသော ဟာသဖြစ်သည်”ဟု ဆရာမြသန်းတင့်က စာရေးသူ၏ အရေးအသားကို ဝေဖန်မှတ်ချက်ပြုထားသည်။

အိမ်ကလေး ၁၆ လုံး (နေဝင်းမြင့်) (ကဗျာ / အက်ဆေး / ပေးစာ / မိန့်ခွန်း / ဟောပြောချက်)

စာရေးဆရာနေဝင်းမြင့်က သူ၏ဘဝသက်တမ်းတစ်လျှောက် နေထိုင်ခဲ့ဖူးသောအိမ်များ၊ အနီးအအနားတစ်ဝိုက်မှ ထူးခြားသည့် အိမ်များအကြောင်းကို ဆောင်းပါးများအဖြစ် ရေးဖွဲ့ထားခြင်းဖြစ်သည်။ အိမ်ဟုဆိုသော်လည်း အိမ်၏ ဆောက်လုပ်ပုံကို အဓိကထား ရေးသားခြင်းမဟုတ်ဘဲ ထိုထိုအိမ်များတွင်နေထိုင်ကြသည့် လူများအကြောင်းကို ဦးတည်ထားရေးထားခြင်းဖြစ်သည်။ တစ်နည်းအားဖြင့် အိမ်နှင့်ဆက်နွယ်နေသည့် အိမ်ရှင်များအကြောင်းကို ရေးသားထားသည့် ဘဝသရုပ်ဖော် ဆောင်းပါးများဖြစ်ကြသည်။ အလွှာအသီးသီးမှ လူတန်းစားအမျိုးမျိုးအကြောင်းကို သူတို့၏ စရိုက်များနှင့်တကွ စိတ်ဝင်စားဖွယ် သိရှိကြရမည်ဖြစ်သည်။ စာရေးသူသည် ဤစာအုပ်ဖြင့် ၂ဝဝ၇ ခုနှစ်အတွက် အမျိုးသားစာပေဆု (ဝတ္ထုတိုပေါင်းချုပ်) ကို ရရှိခဲ့သည်။

အနုပညာကို ဖွဲ့ဆိုကြရာဝယ် (ရုပ်ရှင်၊ သဘင်၊ ပန်းချီနှင့် ဂီတ) (ညီပုလေး, ဒေါက်တာသန်းထွန်း, ဝင်းမြင့်, လူထုဒေါ်အမာ, ကြည်အေး, ချစ်ဦးညို, မောင်သာနိုး, နတ်နွယ်, အောင်ဝေး, မင်းခိုက်စိုးစံ, သုမောင်, ခင်မောင်စန်း, နေဝင်းမြင့်, ဝသုန်, ဆူးငှက်, ရွှေကူမေနှင်း, မောင်ချောနွယ်, အောင်ချိမ့်, နိုင်ဝင်းဆွေ, မောင်ဆွေခင်, ဝင်းစည်သူ, နန်းညွန့်ဆွေ, စန္ဒရားသိမ်းမောင်, မောင်ဆေးရိုး, ဝင်းဖေ, မင်းဆွေနှစ် (မုံရွာ), ဒါရိုက်တာအောင်မြင့်မြတ်, ကိုသန်းထွန်း, မြင့်မောင်ကျော်, ရိုးမြေ, အေးမင်းစော, ဇလတ်, ဒေါင်းမလေး (ရွှေမန်းသဘင်), သီမာဝင်း, မင်းမင်းလတ်) (အနုပညာ / ဖျော်ဖြေရေး)

လူသားတို့၏ ဦးနှောက်နှင့် နှလုံးသားကို ဖွံ့ဖြိုးသန်မာစေသည့် ရသအနုပညာအပါအဝင် ပန်းချီ၊ ဂီတ၊ ရုပ်ရှင်၊ သဘင်ဆိုင်ရာ အကြောင်းအရာများကို ကလောင်ရှင်အသီးသီးတို့က ဆောင်းပါးတစ်ပုဒ်စီဖြင့် တို့ထိရေးသားထားကြခြင်း ဖြစ်သည်။

ဘဝနေနည်း စာစုများ (Your Life Your Choice) (အတွဲ ၂) (နေဝင်းမြင့်, တင်ညွန့်, နှင်းဝေငြိမ်း, မိုးကျော်ဇင်, လင်းခန့်, မွန်ဟော်စီ (Mon Halsey), မင်းထက်ဟန်, မှော်ဝန်းသီဟ, စူးရှမေ, ခင်မောင်သိန်း, ထက်ထက်တင်ဇာ, အီမီဆို, ကောင်းမြတ်ခေတ်, လွိုက်) (ကဗျာ / အက်ဆေး / ပေးစာ / မိန့်ခွန်း / ဟောပြောချက်)

ကလောင်ရှင် (၁၄) ဦး၏ အတွေးအမြင်ဆောင်းပါးများ စုစည်းမှု စာအုပ်ဖြစ်သည်။

အော်တူး၊ ကြည်ကြည်၊ စိုးခ (ဝတ္ထုလတ်သုံးပုဒ်) (ခင်ခင်ထူး, နေဝင်းမြင့်) (ဝတ္ထုရှည်)

လူ့သဘာဝနှင့် လူ့အကြောင်းကို ဝတ္ထုသုံးပုဒ်အဖြစ် သရုပ်ဖော်ရေးသားထားခြင်း ဖြစ်သည်။ အရေးအသားကောင်းသဖြင့် ဖတ်ရင်းဖြင့်ပင် ဇာတ်ကောင်များနှင့် တရင်းတနှီးဖြစ်လာပြီး ကိုယ့်သွေးသားတောင် ဖြစ်လာရသည်ဟု စာအုပ်စီစဉ်သူက ညွှန်းဆိုထားသည်။

မိုးပေါ်က အသံများ (အတွဲ ၂) (ခင်ခင်ထူး, မင်းခိုက်စိုးစံ, နေဝင်းမြင့်, စမ်းစမ်းနွဲ့ (သာယာဝတီ)) (ကဗျာ / အက်ဆေး / ပေးစာ / မိန့်ခွန်း / ဟောပြောချက်)

COVID-19 အလွန်ကာလတွင် Youtube မှတဆင့် ပြုလုပ်ခဲ့သည့် စာပေဟောပြောပွဲ ရုပ်သံအစီအစဉ်တွင် စာရေးဆရာ (၃) ဦး ဟောပြောခဲ့သည်များကို စာအုပ်အဖြစ် မှတ်တမ်းတင် ထုတ်ဝေထားခြင်း ဖြစ်သည်။ လူငယ်များအတွက် စိတ်ခွန်အားဖြစ်စေမည့် အကြောင်းအရာများ၊ ရသစာပေ၏ အရေးပါပုံများကို စာရေးဆရာ (၄) ဦးက သူတို့၏ ဘဝဖြတ်သန်းမှု အတွေ့အကြုံများနှင့်အတူ သိုင်းဝိုင်းဟောပြောထားသည်။

တောအလှူနှင့် လူမှုစီးပွား ရသအက်ဆေးများ (နေဝင်းမြင့်) (ကဗျာ / အက်ဆေး / ပေးစာ / မိန့်ခွန်း / ဟောပြောချက်)

ဓနစီးပွားရေးမဂ္ဂဇင်းတွင် ပါရှိသည့် စာရေးသူ၏ လူမှုစီးပွား ရသအက်ဆေး ၅ ပုဒ်ကို စုစည်းထုတ်ဝေထားခြင်းဖြစ်သည်။ အဆိုပါဆောင်းပါးများမှာ မြန်မာ့ယဉ်ကျေးမှုနှင့် ဆက်နွယ်သော ကျေးလက်ရနံ့ ပါဝင်သည့် ရသစာတမ်းများ ဖြစ်ကြပြီး အညာကျေးလက်ဓလေ့များ၊ ရှင်ပြုပွဲ၊ နတ်ပူဇော်ပွဲများနှင့် ကျေးလက်စီးပွားရေးလုပ်ငန်းများ အကြောင်းကို ပေါ်လွင်အောင် မှတ်တမ်းတင်ထားနိုင်သည်ကို တွေ့ရသည်။

မြို့ပြပိုးမွှားများ (နေဝင်းမြင့်) (ခရီးသွား / ပထဝီဝင်)

မန္တလေး၊ ပုဂံအပါအဝင် အထက်အညာ ကုန်းလမ်း၊ ရေလမ်းခရီးသွား အတွေ့အကြုံဆောင်းပါး (၁၈) ပုဒ်ကို စုစည်း၍ စာအုပ်အဖြစ် ထုတ်ဝေထားခြင်း ဖြစ်သည်။ သက်ဆိုင်ရာ ဒေသအကြောင်း၊ ခရီးလမ်းအကြောင်းသာမက ဒေသခံများ၏ လူမှုရေး၊ စီးပွားရေးများကိုပါ ဆွဲဆောင်မှုရှိစွာဖြင့် မှတ်တမ်းတင် ရေးသားထားသည်ကို တွေ့ရသည်။

ကုမ်ရာသီ အက်ဆေးများ (နေဝင်းမြင့်) (ကဗျာ / အက်ဆေး / ပေးစာ / မိန့်ခွန်း / ဟောပြောချက်)

မဂ္ဂဇင်းများတွင် ဖော်ပြခြင်း ခံခဲ့ရသည့် စာရေးသူ၏ ဆောင်းပါးများကို စုစည်းထုတ်ဝေထားခြင်းဖြစ်သည်။ ပါဝင်သော ဆောင်းပါးစာရင်းကို စာမြည်းရန်တွင် ဖတ်ရှုနိုင်ပါသည်။

ရေကန်သာ ကြာတိုင်းအေး (နေဝင်းမြင့်) (ဝတ္ထုရှည်)

အော့စ်ဖို့ဒ်တက္ကသိုလ်၊ ဒေလီတက္ကသိုလ်၊ အီဂျစ်တက္ကသိုလ်များတွင် ပညာသင်ကြားခဲ့ပြီးနောက် အမေရိကန်တက္ကသိုလ်များတွင် ဆရာအဖြစ် အသက်မွေးဝမ်းကျောင်းပြုနေသူ အိန္ဒိယနိုင်ငံသား အမီတာဗ်ဂို့ရှ်ရေးသားသည့် “မန္တလေးတွင် အစပြုခဲ့သည့် မျိုးဆက်သုံးဆက်၏ အံ့ချီးဖွယ်၊ ဆွတ်ပျံ့ဖွယ်၊ စွဲမက်ဖွယ်ဝတ္ထုရှည်ကြီး”ဖြစ်သည်။ မင်းတုန်းမင်း၊ သီပေါမင်းလက်ထက် မန္တလေးခေတ်မှစတည်ခဲ့သည့် ဤဝတ္ထုကြီးကို မူရင်းစာရေးသူက အင်္ဂလိပ်စစ်တပ်နှင့်အတူ မန္တလေးရောက်ခဲ့သည့် သူ၏အဖေ၏ အတွေ့အကြုံများကို အဓိကထား မှီငြမ်းရေးသားခဲ့သည်ဟု ဆိုသည်။ ဘာသာပြန်သူ ဆရာနေဝင်းမြင့်၏ အမှာစာကို စာမြည်းရန်တွင် ဖတ်ရှုနိုင်ပါသည်။ မူရင်းဝတ္ထု၏ အမည်မှာ Amitav Ghosh၏ The Glass Palaceဖြစ်သည်။ စာရေးသူသည် ဤစာအုပ်ဖြင့် ၂ဝ၁ဝ ခုနှစ်အတွက် အမျိုးသားစာပေဆု (ဘာသာပြန် - (ရသ)) ကို ရရှိခဲ့သည်။